Bil sam na svima, od onih pod Lipom, kod Svetokriške i ovih na Štrosu. Gornjovaroška su mi prirasla srcu iz dva razloga, prvog jel sam bil puno mlajši, drugog jer je naroda bilo puno više. Nekak je sve bilo domače, od ravenskog Drageca Bahuna koji je vu to vreme bil pravi Montipajtonovac, a njegova skrivena kamera je čudi čudoga prikazivala.

Bili su i Dudek i Regica, al se onda nismo tak osečali Gruntovčanima kak danas. Mislim da smo ih i nadmašili u svemu. Onda se, bogmeč, puno toga jelo i pilo, a ljudski potok se vu sitne sate spuštal do centra i svaki drugi čovek se, baš za inat, moral olakšati vu haustoru kaj je išel do mog prebivališta. Drugo jutro sam vu troskoku moral preskakat lokve i ostalo kaj su hitili, a nisu znali kam.

Kaj je – tu je. Velim da Spravišče uspeva, ak je lepo vreme, a malo manje ak nije. Ovaj put bu vruče i za kratke lače i džepove pune. Imali bute puno mesta gde kune i lipe vu lipanjskom trodnevlju morete zatrajati. To kaj bu vam malo falile do kraja meseca, ne brigajte. Spravišče je samo jenput na leto, a morti i bolše, jer ko bi to zdržal.

Vele vračevi da bu tri dana sunčeko sjalo i nebu pljuska, al bu još jenput prvi pljesak u našoj režiji. To bu se splatilo čuti, al si ipak zemite vatu za uši. Ovaj put bu klet na pozornici. Svi smo mi bili bar jenput u kleti, a morti je takvom dekoru pomogla i neviđena pompa naše dalekovidne emisije Uklet(n)ici.

Pak se buju purgeri i šljivari mirili i svadili, makar takva priča baš i nema nekog temelja. Kolko znam, al je znanje krhko, svadili su se navek oni z gornjeg s onima iz donjeg grada. Najme, oni s donjeg su šteli bit gornji, a oni z gornjeg nisu šteli bit dole i tak je sve svršeno u središnjici.

Mučkam si mučkam i kužim da je zapraf sve vu položaju. Jedno nemojte pokušavati, jer je jenput meni potrefilo. Lepo sam se nažderal i nažvakal i onda mi vragec ni dal mira i otišel sam na jednu hali-gali vožnju. Kad sam ateriral, onda sam briljiral. Tri dana nisam došel sebi, sve se vrtelo od mog vrtoleta.

Malo sam se ovih dana potrsil i napravil anketu među pučanstvom jel znaju ko je ko na zidu pokraj starog pla(č)a. Na neslučajnom uzorku od tri ispitanika oba spola i jednog nesvrstanog, potvrdila se moja slutnja da patuljci pojma nemaju. Jen je mislil da je čovek na balkonu romantičar, druga, pak, da dama u šarenom izlazi iz saluna, a neopredeljeni je rekel da nigdar ni videl tak lepu zelenu travu na kalničkoj livadi. Opče nisu skužili da je reč o stripu u nastavcima, nastalom u agenciji mazalookih.

Kukmica ili t.o.č.k.a. – pitanje je sad? Jenima su promenili bravu, drugima dali ključ i krenula je fiškalizacija. Ko bu koga i zakaj. Zna se ko je šerif i nema drugih šerifa osim prvog i još dva. Rat ili mir. Ja sam navek za kokoš, makar i očerupanu ili staru. Ak njih ne volite, nemate niti jaja, a kaj je bilo prije…..Jezikova juha.

Gospon Sluga je, sečam se, 72. speval himnu Spravišča. Nekak smo si pozabili da treba služiti, a ne vladati. Ko prije to skuži, mandat mu je duži. Svi smo mi na streljani, neko prije, a neko posle, a znate da medalja i metak nigdar ne pogode pravog. Kad je Spravišče u pitanju, hičem vu stranu negativu i sve vlečem na pozitivu. Zato, braćo i sestre jedite i pijte i tri dana se smijte, posle bu vam žal.

mn/prigorski.hr